Сәуле Жанпейісова Беделханның бағдарламасын эфирден алып тастауды талап етті.

Жариялаған: , уақыты 03.04.2018 , 1 353 рет оқылды

Белгілі дәстүрлі әнші, Қазақстанның еңбек сіңірген қайраткері Сәуле Жанпейісова “Қазақстан” РТРК АҚ-ның Басқарма төрағасы Ерлан Қаринға ашық хат жолдады.

“Күні кеше еліміздің батыс өңіріне гастрольдік сапармен барып, елдің жағдайын көріп, біріне қуансам, біріне налып, шаршап -шалдығып, денсаулығыма да қарамай ел аралап келіп жеткен бетім еді. Кешкісін Сіз басқаратын Ұлттық арнаны қосып, (бағдарламаның атын есімде сақтай алмадым, кешірерсіз!) Ерболат Беделхан дейтін продюсердің қазақтың жас қыздарымен бір өзі жүргізіп отырған кастингін көріп, жағамды ұстадым. Халқымыздың ғасырлар бойғы дәстүрлі өнеріне айына бір сағат уақыт бөлінбей отырған Ұлттық арнадан ұлтымыздың тамырына балта шабатын мұндай жобаның көрсетілуін қалай түсінуге болады? Өнерге ынтасы бар жас қыздардың тағдырын бір өзі шешетін Ерболат Беделхан дейтін кім еді? Ұлтымыздың мүддесіне қайшы келетін еш мағынасы жоқ сөздермен былғанған жат ағымды музыка түрін насихаттап, жас қыздардың санасын улап, кімге қандай үлгі көрсетпек? Мұндай бағдарламаны көрсетудегі Ұлттық арнаның мақсаты не? Біз білетін 60 жылдық тарихы бар “Қазақстан ” Ұлттық арнасында бұрын-соңды мұндай сорақы дүние көрсетілмеген болар. Мұның арты қайда апарып соғатынын Сіз жақсы білесіз деп ойлаймын. Құрметті Ерлан мырза! Елдің бүгіні мен ертеңін ойлайтын азамат ретінде мынадай сорақылықты жарнамалауға тез арада тиым салуыңызды сұраймын! Бұл біздің болашағымызға зор зиянын тигізетініне күмәнім жоқ. Оның орнына халқымыздың сан ғасырдан бері рухани азығына айналған дәстүрлі өнерін насихаттайтын жаңа жоба ашуыңызды сұраймын. Мен бұған дейін де Сізге дейінгі басшыларға осы ұсынысымды айтумен келем. Өкінішке орай, сөзіміз əрдайым аяқасты қалады. Бұл жалғыз менің сөзім емес, менің бұл ойымды барлық дәстүрлі орындаушылар мен дәстүрлі өнерге жаны ашитын барша көрермен қолдайды. Қазағымның дәстүрлі өнеріне қызмет етіп жүрген жан ретінде мұндай жобаның ашылуына көмек керек болса, біз дайынбыз. Сізден сұранатыным, Ұлттық арна деген атына сай Ұлттық арнамыз Ұлттық дүниені насихаттаса екен! Құрметпен, Қазақстанның еңбек сіңірген қайраткері Сәуле Жанпейісова” – деп жазады әнші инстаграм желісіндегі парақшасында.

3 пікір

  1. Ай

    04.04.2018 at 03:25

    Сонда Қазақстан 18 ғасырда тұрып қалуы керек па? Әрине түсінемін,ұлттық дəстүр,салт жəне т.б Алайда, біз 21 ғасырдың жасөспірімдері,Қазақстанның дамығанын қалаймыз. Шоубизнес арқылы қазіргі көптеген талантты балаларға жол ашылады. Өзім əншілікке қызығамын,бірақ біздің шоубизнестің дәрежесі өте төмен. Ішім аурады. Q-POP бағыты дамуына үлес қосуымыз қажет емес пе? Неге бір нәрсеге жетейік десек,ылғи біреу қарсы болып шығады. “Қазақи”,”ақылды” сөздермен сөйлей бастайды. Менің ойымша Қазақстан киносы,музыкасы әлемдік нарыққа шығуына барлығы түгелдей улес қосқанда жақсы болар еді. Жай ғана сөзбен емес,іспен дәлелдеген жөн!

  2. қазақ баласы

    04.04.2018 at 18:15

    Ай есалан 91 келіп тои ботқадан таза тамаққа айналды кәзір 21 ғасыр 21 12 емес!

  3. gogle

    17.04.2018 at 19:56

    Жабылсын

Пікір қалдыру

Э-пошта мекенжайыңыз жарияланбайды.